Perifrasi verbal

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Las perifrasis verbals son estructuras formadas por un verbo auxiliar (conchugau), una particla d'enlace (que puet mancar) y un verbo en forma verbal impersonal (infinitivo, cherundio u participio de pasau).

Lo conchunto tien un significau unitario que ye diferent que la suma de cadagún de los components y s'ha d'analizar como un tot. N'este sentiu, los components d'una perifrasi verbal actuan chuntos. Las perifrasis verbals permiten matizar l'acción no només que con los tiempos (present, pasau y futuro) y de los modos (indicativo, subchuntivo), que s'expresan con la conchugación, ye dicir con los morfemas que se meten a lo final de la radiz verbal. Se considera que las perifrasis verbals matizan l'aspecto verbal (perifrasis aspectuals) o lo modo (perifrasis modals).

Lo verbo auxiliar gosa estar un verbo liuchero, como los copulativos (estar-ser u ser puro), lo verbo comodín u pro-verbo (fer), los verbos basicos de movimientos (ir, venir) y belatro que, por lo suyo significau, aduyen a matizar l'acción (arribar/plegar, acabar/rematar, continar, encomenzar, tornar, deber, gosar, poder, etcetera). Por un regular se considera que los verbos auxiliars pierden o suyo significau (desemantización u gramaticalización), encara que a vegadas només bi ha una chicota perduga de significau.

En la evolución dende lo latín ta las luengas romances bels tiempos verbals romances apareixioron a partir de perifrasis verbals. Ye o caso de lo futuro d'indicativo (VERBO + Present d'HABERE) y lo condicional (VERBO + Pasau imperfecto d'HABERE).